दारूच्या नशेत वैभववाडी ग्रामीण रुग्णालयाच्या लिपिकाचा तमाशा, वरिष्ठांकडून दुर्लक्ष

वैभववाडी : ड्युटीवर मद्यधुंद अवस्थेत असलेल्या वैभववाडी ग्रामीण रुग्णालयातील त्या लिपिकाचा उपद्रव दिवसेंदिवस वाढत आहे. त्याने पुन्हा दारू प्यायली आणि हॉस्पिटलमध्ये राडा घातला. डॉक्टर आणि कर्मचारी यांच्यासोबत हुज्जत घातली. ही घटना सोमवारी सकाळी ११ वाजता घडली. घडलेला हा प्रकार वरिष्ठांना माहित असूनही त्याच्याकडे दुर्लक्ष होत असल्याची चर्चा होत आहे.

ग्रामीण रुग्णालयातील हा लिपिक नेहमी दारूच्या नशेत येतो. यापूर्वीही त्याने अनेकवेळा असे केल्याचे बोलले जात आहे. यापूर्वीही वैद्यकीय अधिकाऱ्यांनी जिल्हा शल्यचिकित्सकांकडे तक्रार केली आहे. त्याला काही फरक पडला नाही. त्याच्या वागण्यात सुधारणा होत नसल्याने डॉक्टर आणि इतर कर्मचारी हैराण झाले आहेत. सोमवारी सकाळी पुन्हा या लिपिकाने दारू पिऊन रुग्णांसमोर आरडाओरडा केला. तसेच हजेरी पत्रकातही छेडछाड केल्याचे समजते.

लिपिकाची कामे वेळेवर होत नसल्याने रुग्णालयातील कर्मचाऱ्यांना पैसे येऊनही वेळेवर वेतन मिळत नाही. त्यामुळे डॉक्टरांसह कर्मचारीही नाराज झाले आहेत. त्याच्याविरुद्ध यापूर्वी पोलिसांत तक्रारही दाखल झाली होती. होय, हा त्याचा नित्यक्रम झाला आहे. तक्रार करूनही कोणी दखल घेत नसल्याचे डॉक्टरांनी सांगितले. प्रामाणिकपणे काम करणारे अधिकारी व कर्मचारी या दबावाला अक्षरश: कंटाळले आहेत. हे पार्सल येथून हलवण्याची विनंती केली आहे.