धनुष्यबाण कोणाला मिळणार? निवडणूक आयोग आज घेणार निर्णय
मुंबई : महाराष्ट्रात एकनाथ शिंदे विरुद्ध उद्धव ठाकरे यांच्यातील लढाई सर्वोच्च न्यायालयापासून निवडणूक आयोगापर्यंत सुरू आहे. सर्वोच्च न्यायालयाने सत्तासंघर्षावरील सुनावणी फेब्रुवारीपर्यंत पुढे ढकलली आहे. त्याचबरोबर शिवसेनेच्या चिन्ह वादावरही निर्णय घ्यावा लागणार आहे. हे प्रकरण निवडणूक आयोगाकडे आहे. शिवसेनेचे नेतृत्व कोण करणार याबाबत मंगळवारी निवडणूक आयोग निर्णय घेऊ शकतो. शिवसेना पक्षप्रमुख म्हणून उद्धव ठाकरे यांचा पाच वर्षांचा कार्यकाळ 23 जानेवारी रोजी संपत आहे. त्यामुळे हे प्रकरण संपेपर्यंत त्यांना मुदतवाढ द्यावी, अशी विनंती शिवसेनेच्या (उद्धव बाळासाहेब ठाकरे) गटाने निवडणूक आयोगाकडे केली आहे.
निवडणूक आयोगाने संघटनात्मक निवडणुकांना परवानगी दिली तर त्याचा अर्थ शिवसेनेच्या घटनेनुसार उद्धव ठाकरे यांच्या गटाचे अस्तित्व मान्य करणे होय. त्यामुळे एकतर मुदतवाढ किंवा त्यापूर्वी मोठा निर्णय या दोन शक्यता दिसत आहेत. याप्रकरणी आयोगासमोर १० जानेवारी रोजी सुनावणी झाली. पुढील सुनावणी आज म्हणजेच मंगळवारी होणार आहे.
गेल्या वर्षी जूनमध्ये शिवसेनेचे आमदार एकनाथ शिंदे यांनी अचानक एमव्हीए सरकारविरोधात बंड केले. अनेक आमदारांनी त्यांच्याशी संबंध तोडले आणि उद्धव ठाकरेंना मुख्यमंत्रिपदाचा राजीनामा द्यावा लागला. त्यानंतर भाजपसोबत युती करून एकनाथ शिंदे महाराष्ट्राचे मुख्यमंत्री झाले. त्यानंतर हे प्रकरण सर्वोच्च न्यायालयातून निवडणूक आयोगापर्यंत गेले.
पक्षाच्या चिन्ह प्रकरणी एकनाथ शिंदे गटाने गेल्या सुनावणीदरम्यान युक्तिवाद पूर्ण केला होता. यावर आता निवडणूक आयोग मंगळवारी निर्णय देऊ शकतो, असे सांगण्यात येत आहे. दोन्ही पक्षांनी आपला बॅकअप प्लॅन तयार ठेवला आहे. शिंदे गटाला शिवसेनेचे चिन्ह मिळाले तर काय होणार आणि चिन्ह वादात उद्धव जिंकले तर पुढे काय रणनीती असेल.
शिंदे गटाने गेल्या सुनावणीत सर्वोच्च न्यायालयाच्या १९७१ च्या निकालाचा हवाला दिला होता. या निर्णयात माजी पंतप्रधान इंदिरा गांधी यांच्या नेतृत्वाखालील गटाला मूळ काँग्रेस म्हणून मान्यता देण्यात आली. ठाकरे गटाच्या वतीने ज्येष्ठ वकील कपिल सिब्बल १७ जानेवारी रोजी आयोगासमोर युक्तिवाद करणार आहेत.
